काठमाडौँ :पाकिस्तानले टी–२० विश्वकपमा भारतविरुद्धको खेल खेल्न अस्वीकार गरेको छ। यद्यपि भारतीय टोली निर्धारित तालिका अनुसार १५ फेब्रुअरीमा कोलम्बो प्रस्थान गर्नेछ। टोलीले त्यहाँ अभ्यास गर्नेछ भने खेल हुने–नहुने अन्तिम निर्णय म्याच रेफ्रीले गर्ने जनाइएको छ।

यस विवादबीच अर्को प्रश्न उठेको छ ।किन पछिल्ला वर्षहरूमा आइसीसीले हरेक अन्तर्राष्ट्रिय प्रतियोगितामा भारत र पाकिस्तानलाई एउटै समूहमा राखेको ? 

तथ्यांकअनुसार सन् १९९२ यता भएका २७ अन्तर्राष्ट्रिय क्रिकेट परिषद् प्रतियोगितामध्ये २२ पटक भारत–पाकिस्तान आमनेसामने भएका छन्। तीमध्ये १८ खेल भारतले जितेको छ भने पाकिस्तानले ४ खेलमा सफलता पाएको छ।

अन्तर्राष्ट्रिय क्रिकेट परिषद्ले यी दुई टोलीलाई एउटै समूहमा राख्नुको मुख्य कारण उच्च दर्शक संख्या र व्यावसायिक फाइदा हो। भारत–पाकिस्तान खेल विश्व क्रिकेटकै सबैभन्दा धेरै हेरिने खेलमध्ये पर्छ। यस्ता खेलहरू विश्वभर औसतमा २७ देखि २८ करोड दर्शकले हेर्ने गरेका छन्। सन् २०१९ को एकदिवसीय विश्वकपमा भएको भारत–पाकिस्तान खेल मात्र २७ करोड दर्शकले हेरेका थिए, जुन सो प्रतियोगिताको कुल दर्शक संख्याको ठूलो हिस्सा थियो।

सन् २०११ को विश्वकप सेमिफाइनल अहिलेसम्मकै सबैभन्दा धेरै हेरिएको खेल मानिन्छ, जसलाई करिब ४९ करोडभन्दा बढी दर्शकले हेरेका थिए।

सन् २०२४ देखि २०२७ सम्मका मिडिया अधिकार अन्तर्राष्ट्रिय क्रिकेट परिषद्ले करिब ३ अर्ब अमेरिकी डलरमा बिक्री गरिसकेको छ। त्यसैले प्रसारणकर्ताहरू भारत–पाकिस्तान खेल सुनिश्चित गर्न चाहन्छन्, जसले उच्च दर्शक संख्या र आम्दानी सुनिश्चित गर्छ।

भारत–पाकिस्तान खेल हुँदा आयोजक सहरलाई पनि ठूलो आर्थिक फाइदा पुग्ने गर्दछ। होटल, हवाई टिकट, यातायात र अन्य व्यवसायमा उल्लेखनीय वृद्धि हुन्छ।

द्विपक्षीय श्रृंखला बन्द भएपछि यी दुई देशबीचको प्रतिस्पर्धा बहुराष्ट्रिय प्रतियोगितामा मात्र सीमित भएको छ। सन् २०१२ पछि अन्तर्राष्ट्रिय क्रिकेट परिषद् प्रतियोगितामा भारत र पाकिस्तान १२ पटक भिडेका छन्, जसमा भारतले १० खेल जितेको छ भने पाकिस्तानले २ खेल जितेको छ।

यसरी हेर्दा भारत–पाकिस्तान प्रतिस्पर्धा केवल खेल मात्र नभई विश्व क्रिकेटको सबैभन्दा ठूलो व्यावसायिक र भावनात्मक आकर्षण बनेको छ।