काठमाडौँ :आइसिसी टी–२० विश्वकप छनोट प्रतियोगिता आज (बुधबार) ओमानमा सुरु हुँदैछ । एसिया तथा इस्ट एसिया–प्यासिफिक क्षेत्रीय छनोटअन्तर्गत नेपालले पहिलो खेल कुवेतसँग खेल्दै अभियान सुरु गर्न लागेको हो । नेपाली समय अनुसार यो खेल आज राति पौने ९ बजे हुनेछ ।

वेस्ट इन्डिजविरुद्ध यूएईमा टी–२० सिरिज जितेपछि ओमान पुगेको नेपाली टोली अहिले उत्कृष्ठ लयमा छ । कतारविरुद्धका दुई अभ्यास खेलमा पनि नेपालले सहज जित हात पारेको थियो, जसले टोलीको आत्मविश्वास झनै उच्च बनाएको छ ।

कप्तान रोहित पौडेल नेतृत्वको नेपाली टोलीले यसपटकको छनोटलाई तेस्रो पटक विश्वकप यात्रा सुनिश्चित गर्ने अवसरका रूपमा लिएको छ । नेपालले यसअघि सन् २०१४ (बङ्गलादेश) र सन् २०२४ (अमेरिका–वेस्ट इन्डिज) मा टी–२० विश्वकप खेलेको थियो ।

नेपाल समूह ‘बी’ मा रहेको छ, जसमा कुवेत र जापान पनि छन् । पहिलो खेल कुवेतसँग र दोस्रो खेल शुक्रबार जापानसँग हुनेछ । नेपाल र कुवेतबीच अघिल्ला प्रतियोगितामा मिश्रित नतिजा रहेका छन् भने जापानसँग नेपाल पहिलो पटक भिड्न लागेको हो ।

यसपटकको एसिया तथा इस्ट एसिया–प्यासिफिक छनोटमा नौ टोली सहभागी छन् । ती टोलीलाई तीन समूहमा विभाजन गरिएको छ ।

समूह ‘ए’ : संयुक्त अरब इमिरेट्स (यूएई), मलेसिया, कतार

समूह ‘बी’ : नेपाल, कुवेत, जापान

समूह ‘सी’ : ओमान, पपुवा न्युगिनी, सामोआ

सिङ्गल राउन्ड–रोबिन प्रारूपमा हुने लिग चरणपछि प्रत्येक समूहका शीर्ष दुई टोली ‘सुपर सिक्स’मा प्रवेश गर्नेछन् । त्यहाँबाट शीर्ष तीन टोलीले आगामी वर्ष भारत र श्रीलङ्कामा हुने आइसिसी टी–२० विश्वकप २०२६ मा स्थान पाउनेछन् ।

सन् २०२६ को विश्वकपमा २० देश सहभागी हुनेछन् । हालसम्म १७ देशले विश्वकपमा स्थान पक्का गरिसकेका छन्, बाँकी तीन स्थान यही छनोटबाट तय हुनेछ ।

नेपालको हालको प्रदर्शन, बलियो युवा संयोजन, र रोहित पौडेलको नेतृत्व क्षमताले नेपाली क्रिकेटमा नयाँ आशा जगाएको छ । युवा खेलाडीहरूको उर्जा, बलिङको गहिराइ, र ब्याटिङमा देखिएको स्थायित्वले यसपटक विश्वकपमा पुनः फिर्ती सम्भावना प्रबल देखिन्छ ।

नेपाली क्रिकेट फ्यानका लागि यो छनोट केवल प्रतियोगिता होइन — देशकै क्रिकेट गौरव दोहोर्याउने मौका हो ।