काठमाडौँ : फेब्रुअरी २०२६ का लागि आईसीसी मेन्स प्लेयर अफ द मन्थ का मनोनयनहरू सार्वजनिक भएका छन्। भर्खरै सम्पन्न टी–२० विश्वकपमा उत्कृष्ट प्रदर्शन गर्ने ३ खेलाडी यस पटक अवार्डको दौडमा परेका छन्।

यस पटकको मनोनयनमा परेका खेलाडीहरू यस प्रकार छन्:

१. साहिबजादा फरहान (पाकिस्तान)
पाकिस्तानका ओपनर साहिबजादा फरहानले यो विश्वकपमा कीर्तिमानी ब्याटिङ गरेका थिए। उनले ७ खेलमा ३ सय ८३ रन बनाउँदै एकै विश्वकपमा सबैभन्दा धेरै रन बनाउने विराट कोहलीको रेकर्ड तोडेका छन्। उनले नामिबिया र श्रीलंकाविरुद्ध शतक समेत प्रहार गरेका थिए, जुन टी–२० विश्वकपको एउटै संस्करणमा दुई शतक प्रहार गर्ने पहिलो रेकर्ड हो।

२. विल ज्याक्स (इङ्गल्याण्ड)
इङ्गल्याण्डका अलराउन्डर विल ज्याक्सले ब्याटिङ र बलिङ दुवैमा आफ्नो प्रभाव छोडे। उनले ९ खेलमा १ सय ९४ रन बनाउनुका साथै ११ विकेट लिए। विश्वकपमा उनले ४ पटक 'प्लेयर अफ द म्याच' को अवार्ड जितेका थिए। उनको प्रदर्शनकै मद्दतमा इङ्गल्याण्ड सेमिफाइनलसम्म पुग्न सफल भएको थियो।

३. शाड्ली भान शाल्कविक (अमेरिका)
अमेरिकाका तीव्र गतिका बलर शाड्ली भान शाल्कविकले यो महिना सबैलाई अचम्ममा पारे। उनले विश्वकपका मात्र ४ खेलमा १३ विकेट लिएका थिए। समूह चरणमा उनी सर्वाधिक विकेट लिने बलर बनेका थिए, जहाँ उनले भारत र पाकिस्तानविरुद्ध समान ४–४ विकेट लिएका थिए।

फेब्रुअरी महिनाको यो अवार्डका लागि  क्रिकेट समर्थकहरूले आईसीसीको वेबसाइटमा गएर मतदान गर्न सक्नेछन्।