काठमाडौँ :भारतको गुहाटीमा जारी पाँच खेलको टी–२० सिरिजमा नेपाल 'ए' चौथो खेलमा आसामसँग १८ रनले पराजित भएको छ।

एसीए स्टेडियममा टस जितेर पहिले ब्याटिङ गरेको आसामले २० ओभरमा ५ विकेट गुमाएर १७४ रनको योगफल तयार पारेको थियो। १७५ रनको लक्ष्य पछ्याएको नेपाल 'ए' निर्धारित ओभरमा ९ विकेटको क्षतिमा १५६ रनमै रोकिएको हो।

नेपाल 'ए' का लागि कप्तान अनिल कुमार शाहले ५० बलमा ७ चौका र २ छक्कासहित सर्वाधिक ६७ रन बनाए। इशान पाण्डेले २० बलमा २७ रन जोडे भने पावरप्लेमै सन्दीप जोरा ११ र वसिर अहमद २ रनमा आउट भए। आदिल आलम ११ रनमा विकेटकिपरलाई क्याच दिए।

बलिङतर्फ आसामका अभिनव चौधरी र अब्दुल अजिज कुरासीले ३–३ विकेट लिँदा साद्दिक हुसेनले १ विकेट लिए।

यसअघि आसामका कप्तान सुमित घडिअन्करले ४७ बलमा ७० रन प्रहार गर्दै पारीलाई मजबुत बनाएका थिए। उनले ओपनर ऋषिकेश तामुलीसँग पहिलो विकेटका लागि ९० रनको साझेदारी गरेका थिए। ऋषिकेशले ४६ रन बनाए।

नेपाल 'ए 'का लागि आकाश चन्दले २ विकेट लिए भने वसिर अहमदले १ विकेट हात पारे।

योसँगै पाँच खेलको  सिरिज २–२ को बराबरीमा राेकिएकाे छ। निर्णायक तथा अन्तिम खेल सोमबार साँझ ५ बजे हुनेछ।