काठमाडौँ :विजयी जुलुस मनाउने क्रममा भएको भागदौडमा ज्यान गुमाएका परिवारलाई आइपिएल विजेता रोयल च्यालेन्जर्स बैंगलुरुले आर्थिक सहायता प्रदान गरेको छ ।

आरसीबीले आईपीएल २०२५ जितेपछि उत्सव मनाउने क्रममा भागदौडमा मृत्यु भएका परिवारलाई २५–२५ लाख रुपैयाँ सहायता प्रदान गरेको भारतीय सञ्चारमाध्यमहरुले जनाएका छन् । आरसीबीले सामाजिक सञ्जाल प्लेटफर्म ‘एक्स’ मा जारी गरेको विज्ञप्तिमा भनिएको छ, “हाम्रो दिल ४ जुन, २०२५ मा टुक्रियो। हामीले आरसीबी परिवारका ११ सदस्यलाई गुमायौं। उनीहरू हाम्रो शहर, समुदाय र टीमको अभिन्न हिस्सा थिए। उनीहरूको कमी हाम्रो स्मृतिमा सधैं रहनेछ।”
टीमले थप भन्यो, “उनीहरूको स्थान कसरी पनि भरिन सक्दैन। तर पहिलो कदमका रूपमा र गहिरो सम्मानका साथ, हामीले उनीहरूको परिवारलाई २५–२५ लाख रुपैयाँ दिएको छ। यो मात्र आर्थिक सहयोग होइन, करुणा, एकता र निरन्तर हेरचाहको प्रतिवद्धता पनि हो। यसै सन्दर्भमा आरसीबी ‘केयर्स’ कार्यक्रमको शुरुवात भएको हो।” टीम व्यवस्थापनले ‘आरसीबी केयर्स’ सम्बन्धमा थप जानकारी छिट्टै सार्वजनिक गरिने जनाएको छ।