काठमाडौँ :पपुआ न्यूगिनी (पीएनजी) राष्ट्रिय क्रिकेट टोलीका स्टार विकेटकिपर–ब्याट्सम्यान किप्लिन डोरिगा डकैती आरोपमा पक्राउ परेका छन्। जर्सीको राजधानी सेन्ट हेलियर्समा गत अगस्त २५ तारिखमा भएको डकैती प्रकरणमा उनको संलग्नता रहेको भन्दै प्रहरीले नियन्त्रणमा लिएको हो।

डोरिगा त्यतिबेला पीएनजी टोलीसँगै आईसीसी क्रिकेट वर्ल्ड कप च्यालेन्ज लिग ‘ए’ खेल्न जर्सीमा थिए। उनले २१औं खेलमा कुवेतविरुद्ध मैदान ओर्ली २९ बलमा १२ रन बनाए पनि सो खेलपछि उनको नाम विवादमा जोडियो। त्यसपछि उनले बाँकी दुई खेल गुमाएका छन्।

पक्राउ परेपछि उनलाई मजिस्ट्रेट कोर्टमा उपस्थित गराइएको छ, जहाँ समाचार अनुसार उनले आफूमाथिको अपराध स्वीकार गरेका छन्। अब उनलाई आगामी नोभेम्बर २८ मा रोयल कोर्टमा पेश गरिनेछ। तर, जमानत माग अस्वीकृत भएपछि उनी त्यतिबेलासम्म हिरासतमै रहने भएका छन्।

यसबीच, पीएनजी क्रिकेट संघले यो घटनालाई व्यक्तिगत प्रकरण बताउँदै औपचारिक टिप्पणी नगरेको छ। हिरासतमा रहेकै कारण डोरिगाले अन्तर्राष्ट्रिय क्रिकेटसमेत गुमाउने भएका छन्।

२९ वर्षीय डोरिगाले हालसम्म पीएनजीका लागि ९७ अन्तर्राष्ट्रिय खेल खेलेका छन्। उनले ३९ एकदिवसीयमा ७३० रन प्रहार गर्दै चारवटा अर्धशतक बनाएका छन्। टी–२० अन्तर्राष्ट्रियमा भने ३८ खेलमा उनले ३५० रन जोडेका छन्। उनले सन् २०२१ र २०२४ का टी–२० विश्वकपमा समेत आफ्नो उपस्थिति जनाएका थिए।