काठमाडौं :साफ यू–१७ महिला च्याम्पियनसिपमा आज नेपालले आफ्ना सबभन्दा कठिन प्रतिस्पर्धी भारतसँग प्रतिस्पर्धा गर्दैछ ।
भुटानको चाङ्लिमिथाङ रंगशालामा हुने खेल नेपाली समयअनुसार साँझ पौने ६ बजे सुरु हुनेछ ।

यसअघि भएको पहिलो भेटमा भारतले नेपाललाई ७–० ले हराएको थियो । त्यसपछि बंगलादेशसँग लगातार हार बेहोरेपछि नेपाल उपाधि होडमै बाहिरिसकेको छ । ४ खेलमध्ये केवल १ जित निकाल्न सफल नेपाल ३ अंकसहित तालिकाको तेस्रो स्थानमा छ ।

प्रतियोगिता डबल राउण्ड रोबिन लिगका आधारमा भइरहेको छ । हालसम्म भारत ४ खेलमै जित निकाल्दै १२ अंकसहित शीर्ष स्थानमा छ भने ९ अंक जोडेको बंगलादेश दोस्रो स्थानमा छ । आयोजक भुटान भने अझै जितविहीन रहँदै पुछारमा छ ।

नेपालले भारतसँग पहिलो खेल गुमाए पनि भुटानलाई २–१ ले हराएको थियो । तर बंगलादेशविरुद्ध दुई खेलमै पराजय भोग्दा नेपालको यात्रा समयमै कठिन बनेको हो । चार टोली सहभागी प्रतियोगितामा सबैभन्दा बढी अंक जोड्ने टोलीलाई उपाधि प्रदान गरिने प्रावधान छ ।