काठमाडौं :अष्ट्रेलियाको तयारी यात्रामा रहेको नेपाली राष्ट्रिय क्रिकेट टोलीले बिहीबार निराशाजनक प्रदर्शन गर्‍यो। टोलीले साउथ अष्ट्रेलियासँग खेलेका लगातार दुई टी–२० अभ्यास खेलमा पराजय व्यहोरेको छ।

तेस्रो खेल : अन्तिम बलमै हार

पहिलो खेल (तेस्रो अभ्यास खेल) मा टस हारेर ब्याटिङ गरेको नेपालले २० ओभरमा ९ विकेट गुमाउँदै १४६ रन बनायो।
नेपालले दिएको १४७ रनको लक्ष्य साउथ अष्ट्रेलियाले सात विकेट गुमाउँदै रोमाञ्चक ढंगले भेट्टायो। अन्तिम बलमा ४ रन चाहिएको अवस्थामा ब्राउनले चौका प्रहार गर्दै घरेलु टोलीलाई जित दिलाए।

साउथ अष्ट्रेलियाका विन्टरले ३६ रन र कप्तान हार्भीले २७ रन जोडे। नेपालका लागि सोमपाल कामीले ३, नन्दन यादवले २ र कप्तान रोहित पौडेलले १ विकेट लिए।

चौथो खेल : तीन रनले चुक्यो नेपाल

दोस्रो खेल (चौथो अभ्यास खेल) मा साउथ अष्ट्रेलियाले टस जितेर पहिले ब्याटिङ गर्दै ८ विकेटको क्षतिमा १६० रन बनायो।
आर. किङले ३४ रन बनाए भने बलिङतर्फ नेपालका रुपेश सिंह, करण केसी र सहाब आलमले समान २–२ विकेट लिएका थिए।

जवाफी ब्याटिङमा नेपाल ३ रनले लक्ष्य चुक्यो। १९ बलमा ३७ रन बनाएका रुपेश सिंह, २६ बलमा ३२ रन प्रहार गरेका लोकेश बल र २६ बलमा २९ रन जोडेका भिम शार्कीले प्रयास गरे पनि टोली २० ओभरमा १५७ रनमै रोकियो।

अब एकदिवसीय अभ्यास खेल

अष्ट्रेलियाली भ्रमणमा नेपालले शनिबार साउथ अष्ट्रेलियाविरुद्ध एकदिवसीय अभ्यास खेल खेल्दैछ।