दिल्ली:भारतीय क्रिकेटका दुई अनुभवी खेलाडी विराट कोहली र रोहित शर्माको २०२७ ओडिआई विश्वकप खेल्ने संभावना कमजोर हुँदै गएको छ। दुबै खेलाडी अहिले टी२० र टेस्ट क्रिकेटबाट संन्यास लिइसकेका छन् र हाल एकदिवसीय (ओडिआई) क्रिकेट मात्र खेलिरहेका छन्।

सन् २०२७ को विश्वकप अझै दुई वर्ष टाढा छ, तर बीसीसीआई (भारतीय क्रिकेट बोर्ड) भित्र उनीहरूको भविष्यबारे गम्भीर छलफल सुरु भएको छ। एक अधिकारीले पीटीआईलाई बताएका अनुसार, "२०२७ सम्ममा रोहित र विराटको उमेर करिब ४० पुग्नेछ। त्यसैले यस्तो ठुलो प्रतियोगिताका लागि अब स्पष्ट योजना आवश्यक छ।" उनले थपे, "युवा खेलाडीलाई समयमै मौका दिनुपर्ने आवश्यकता पनि देखिएको छ।"

शुभमनको कप्तानीमा नयाँ पुस्ताको उदय
हालै इंग्ल्याण्डविरुद्धको ओडिआई सिरिजमा शुभमन गिलको कप्तानीमा भारतीय टोलीले सशक्त प्रदर्शन गर्दै सिरिज २–२ को बराबरीमा टुंग्याएको थियो। यशस्वी जयसवाल, ऋषभ पन्त, प्रसिद्ध कृष्णा, सिराज, आकाश दीपजस्ता युवा खेलाडीहरूले राम्रो प्रभाव छोडेका छन्।

यसैले बीसीसीआईले अब विराट र रोहितसँग उनीहरूको मानसिक र शारीरिक अवस्था बुझ्न छलफल गर्ने तयारी गरेको छ। बोर्डको धारणा छ कि उनीहरूलाई दबाब दिएर हटाइने छैन। तर, विश्वकप चक्र सुरु हुनु अघि उनीहरूको अवस्थाबारे पेशेवर रूपमा समीक्षा हुनेछ।

के ओडिआईबाट पनि बिदा हुने तयारीमा छन्?
टी२० विश्वकप २०२४ जितेपछि रोहित र विराटले सो फर्म्याटबाट संन्यास घोषणा गरेका थिए। त्यसपछि टेस्टमा पनि उनीहरूको प्रदर्शन सन्तोषजनक रहेन, जसका कारण दुवैले इंग्ल्यान्ड सिरिजअघि टेस्ट क्रिकेट पनि छाडे। फ्यानहरूबीच अब प्रश्न उठ्न थालेको छ — के अब उनीहरूलाई एकदिवसीयबाट पनि क्रमशः बाहिर गरिँदैछ?

अग्निपरीक्षा बन्नेछ अष्ट्रेलिया र दक्षिण अफ्रिकाविरुद्धको सिरिज
दुबैले मार्चमा भएको च्याम्पियन्स ट्रफीको फाइनलपछि अन्तर्राष्ट्रिय खेल खेलेका छैनन्। आगामी च्याम्पियन्स ट्रफी टी२० फर्म्याटमै हुने भएकाले उनीहरू सहभागी हुने छैनन्।
अगस्टमा हुने भनिएको बंगलादेशविरुद्धको सिरिज स्थगित भइसकेको छ। अब भारतको आगामी ओडिआई सिरिज अक्टोबरमा अष्ट्रेलियासँग र नोभेम्बरमा दक्षिण अफ्रिकासँग हुनेछ। यी सिरिजहरूमा विराट र रोहितको प्रदर्शन निर्णायक हुने देखिएको छ।