काठमाडौं :इंग्ल्याण्डविरुद्धको पाँचौं तथा अन्तिम टेस्टमा ६ रनको रोमाञ्चक जित निकाल्दै भारतले शृंखला बराबरीमा टारेको छ ।

जो रुट र ह्यारी ब्रूकको शतकका बाबजुद इंग्ल्याण्ड फिनिसिङमा चुक्दा शृंखला २-२ को बराबरीमा सकिएको हो ।

पाँचौं दिन पहिलो सेसनमा ३७४ रनको लक्ष्य पछ्याउँदै इंग्ल्याण्ड ३६७ रनमा अलआउट भयो । ब्रूकले १११ तथा रुटले १०५ रन बनाए पनि बाँकी खेलाडी टिक्न सकेनन् ।

आइतबार चौथो दिनमै खेल सकिने अपेक्षा गरिएको थियो तर खराब प्रकाशका कारण खेल रोकिएको थियो । अन्तिम दिन ४ विकेट बाँकी राख्दै ३५ रन आवश्यक रहेको इंग्ल्याण्डले थप २८ रन मात्र जोड्न सक्यो ।

भारतका लागि मोहम्मद सिराजले ५ विकेट लिए भने प्रसिध कृष्णाले ४ विकेट हात पारे । गस एट्किन्सनलाई बोल्ड गर्दै सिराजले आफ्नो पाँचौं विकेट पूरा गर्दै भारतलाई जित दिलाए ।

यसअघि पहिलो इनिङमा भारत २२४ रनमा अलआउट भएको थियो भने इंग्ल्याण्डले २४७ रन बनाएर २३ रनको अग्रता लिएको थियो । पहिलो इनिङमा करुण नायरले भारतका लागि सर्वाधिक ५७ रन बनाए । इंग्ल्याण्डका गस एट्किन्सनले ५ विकेट लिए ।

इंग्ल्याण्डका ज्याक क्रलीले ६४, ब्रूकले ५३ र बेन डकेटले ४३ रन बनाए । सिराज र कृष्णाले ४-४ तथा आकाश दीपले १ विकेट लिए ।

दोस्रो इनिङमा भारत ३९६ रनमा अलआउट हुँदै इंग्ल्याण्डलाई ३७४ रनको लक्ष्य दिएको थियो । यस इनिङमा यशश्वी जैसवालले ११८ रन बनाए भने आकाश दीपले ६६, रविन्द्र जडेजा र वासिङटन सुन्दरले समान ५३ रन बनाए । जोश टङले ५, गस एट्किन्सनले ३ र जेमी ओभरटनले २ विकेट लिए ।

शृंखलामा पहिलो टेस्ट इंग्ल्याण्डले जितेको थियो भने दोस्रो टेस्ट भारतले आफ्नो पक्षमा पारेको थियो । तेस्रो टेस्ट फेरि इंग्ल्याण्डले जित्दा चौथो टेस्ट ड्र भएको थियो ।