काठमाडौं : नेपाली राष्ट्रिय क्रिकेट टोलीका स्टार खेलाडी सन्दीप लामिछानेले नयाँ यात्रा सुरु गरेका छन्। उनले आफै घोषणा गर्दै @sansicproductions नामक संगीत प्रोडक्सन हाउसको प्रमुख कार्यकारी अधिकृत (सीईओ) बनेको जानकारी दिएका छन्।

सन्दीपले सामाजिक सञ्जालमार्फत भनेका छन्, “क्रिकेटरको रूपमा मेरो कथामा संगीत सधैं साथ रह्यो। जितपछि ‘रातो र चन्द्र सूर्य’ गाउँदा होस् या कुनै भावनालाई गीतमार्फत व्यक्त गर्दा — संगीत सधैं मेरो यात्रा सँगै थियो।”

यस यात्रामा सन्दीपसँगै उनका दाजु अनमोल लामिछाने पनि छन्, जो एक प्रतिभाशाली संगीतकार, गीतकार तथा प्रोड्युसर हुन्। उनीहरूले नेपालका अन्य थुप्रै कलाकारसँग मिलेर मन छुने गीतहरू ल्याउने योजना बनाएका छन्।

सन्दीपले संगीत र क्रिकेट दुवै क्षेत्रमा नेपालका लागि योगदान दिन प्रतिबद्ध रहेको बताएका छन्। उनले लेखेका छन्, “तपाईंहरूको माया र साथका लागि आभारी छु। क्रिकेटमै होइन, संगीतमार्फत पनि नेपालका लागि आफ्नो शतप्रतिशत दिनेछु।”