काठमाडौँ :इन्डियन प्रिमियर लिग (आईपीएल) मा रोयल च्यालेन्जर्स बेङ्गलुरुले (आरसीबी) पहिलो पटक उपाधि जितेको खुसीमा आयोजना गरिएको उत्सवमा ११ जनाको ज्यान गएपछि भारतमा सामाजिक सञ्जाल ‘एक्स’मा #ArrestKohli र #ShameOnRCB ह्यासट्याग ट्रेन्डिङमा रहेका छन्।

मङ्गलबार पञ्जाब किङ्सलाई हराएर ऐतिहासिक जित पछि भएको कार्यक्रमको क्रममा चिन्नास्वामी स्टेडियममा भीड नियन्त्रणमा समस्या भएपछि भागदौड मच्चियो। यसमा ११ समर्थकको मृत्यु भयो भने सयौं घाइते भए।

घटनापछि विराट कोहली, जो त्यही दिन मुम्बई विमानस्थलमा लन्डन जाने क्रममा पत्नी अनुष्का शर्मासँग देखिएका थिए, सामाजिक सञ्जाल प्रयोगकर्ताले उनलाई गिरफ्तार गर्नुपर्ने माग गर्दै आक्रोश पोखेका छन्।

एक ‘एक्स’ प्रयोगकर्ताले भनेका छन्, “कोहलीले मृत फ्यानका परिवारलाई भेट्नुपथ्र्यो, तर उनले हतारमा लन्डन यात्रा रोजे। यो अमानवीयता हो।” अर्काले भने, “फ्यानको मृत्यु हुँदा उनको आँसु कहाँ गयो? उनले हाम्रो सम्मान गुमाए।”

तर केही समर्थकले खेलाडीलाई दोष नदिन आग्रह गर्दै भनेका छन् कि भीड व्यवस्थापनमा कमजोरी मुख्य कारण हो र कोहलीले कार्यक्रमपछि मात्रै यात्रा गरेका हुन्।

आरसीबीको जितलाई यो दुखद् घटनाले छायामा पारेको छ र सामाजिक सञ्जालमा विराट कोहली र टोलीको आलोचना भइरहेको छ।