काठमाडौं : आईसीसी विश्वकप लिग–२ का लागि स्कटल्याण्ड पुगेको नेपाली क्रिकेट टोली अभ्यास खेलमा पराजित भएको छ। स्कटल्याण्ड ए सँग बिहीबार भएको खेलमा नेपाल १०२ रनको ठूलो अन्तरले पराजित भयो।

युके भ्रमणको क्रममा अघिल्ला अभ्यास खेलमा अपराजित रहेको नेपालले स्कटल्याण्डको मैदानमा भने पहिलो हार बेहोरेको हो।

वर्षाले प्रभावित खेलमा स्कटल्याण्डको बलियो प्रदर्शन

वर्षाका कारण ५० ओभरको खेल ४० ओभरमा सीमित गरिएको थियो। पहिले ब्याटिङ गरेको स्कटल्याण्ड ए ले ४० ओभरमा ९ विकेट गुमाउँदै २२० रन बनायो। कप्तान क्रिस म्याकब्राइडले ७२ रनको उत्कृष्ट पारी खेले भने जेमी डन्कले ४८ रन, ओवेन गुल्डले २८ रन र लियाम नेलरले २५ रन बनाए।

नेपालका लागि सोमपाल कामीले ८ ओभरमा ३५ रन दिँदै ४ विकेट लिए। रिजन ढकालले २ विकेट हात पार्दा गुल्शन झा र ललित राजवंशीले १–१ विकेट लिए।

नेपालको कमजोर ब्याटिङ प्रदर्शन

२२१ रनको लक्ष्य पछ्याउन उत्रेको नेपाल २९.४ ओभरमै ११८ रनमा समेटियो। आरिफ शेखले सर्वाधिक ४४ रन बनाए। कप्तान रोहित पौडेलले १७ रन बनाए भने गुल्शन झाले १० रनको योगदान दिए। बाँकी ब्याट्सम्यान दोहोरो अंक छुन असफल रहे।

स्कटल्याण्डका जैनुल्लाह इहसानले नेपाली ब्याटिङ लाइनअप ध्वस्त पार्दै ४ विकेट लिए। म्याकेन्जी जोन्सले ३ विकेट झारे भने जेम्स डिकिन्सनले २ र ओली डेभिडसनले १ विकेट लिए।

अर्को अभ्यास खेल शनिबार

नेपालले अब शनिबार स्कटल्याण्ड ए सँग दोस्रो अभ्यास एकदिवसीय खेल खेल्नेछ। यो खेल विश्वकप लिग–२ मा हुने प्रतिस्पर्धाका लागि नेपालका लागि महत्वपूर्ण अभ्यास हुने अपेक्षा गरिएको छ।