सोसल मिडिया
हाम्रो बारेमा
प्रयोगका सर्त
काठमाडौं :आइपिएलको रोमाञ्चक लहरमा गुजरात टाइटान्सले दिल्ली क्यापिटल्सविरुद्ध १० विकेटको प्रभावशाली जित निकाल्दै प्लेअफको यात्रा सुनिश्चित गरेको छ।
आइतबार सम्पन्न दोस्रो खेलमा दिल्लीले दिएको २०० रनको ठूलो लक्ष्य गुजरातले १९ ओभरमै बिना विकेट गुमाई पुरा गर्यो। ओपनर साइ सुदर्शनले आक्रामक अविजित शतक प्रहार गरे भने कप्तान शुभमन गिलले अविजित ९३ रनको साथ उत्कृष्ट साथ दिए।
सुदर्शनले ६१ बलमा १२ चौका र ४ छक्का प्रहार गर्दै १०८ रनको अविजित इनिङ्स खेले। उता गिलले ५३ बलमा ३ चौका र ७ छक्का प्रहार गर्दै ९३ रनमा अविजित रहे।
त्यसअघि टस हारेर पहिला ब्याटिङ गरेको घरेलु टोली दिल्ली क्यापिटल्सले २० ओभरमा ३ विकेट गुमाउँदै १९९ रनको चुनौतीपूर्ण स्कोर बनाएको थियो। ओपनर केएल राहुलले ११२ रनको अविजित शतकीय पारी खेले। उनलाई अभिषेक पोरेल (३०), अक्षर पटेल (२५) र ट्रिस्टन स्टब्स (२१ अविजित) ले साथ दिएका थिए।
गुजरातका लागि अर्शद खान, प्रसिध कृष्णा र साइ किशोरले समान १-१ विकेट लिए।
यस जितसँगै गुजरातले १२ खेलमा १८ अंक जोड्दै अंक तालिकाको शीर्ष स्थानमा उक्लिएको छ। बेंगलुरु र पञ्जाब समान १७ अंकसहित दोस्रो र तेस्रो स्थानमा छन्। यी तीनै टोलीले प्लेअफमा स्थान बनाइसकेका छन्।
यसअघि पहिलो खेलमा पञ्जाबले राजस्थान रोयल्सलाई १० रनले हराउँदै प्लेअफको ढोका ठोकेको थियो। अब बाँकी रहेको एक स्थानको लागि दिल्ली, मुम्बई इन्डियन्स र लखनउ सुपर जायन्ट्सबीच प्रतिस्पर्धा रहनेछ।
