सोसल मिडिया
हाम्रो बारेमा
प्रयोगका सर्त
काठमाडौँ : रोस्टन चेसलाई वेस्ट इन्डिजको टेस्ट टोलीको नयाँ कप्तान नियुक्त गरिएको छ।
यो नियुक्तिसँगै ३३ वर्षीय अलराउन्डरले आफ्नो करियरको ५०औं टेस्ट खेल कप्तानको रूपमा खेल्नेछन्। उनले आफ्नो अन्तिम टेस्ट दक्षिण अफ्रिकाविरुद्ध जोहान्सबर्गमा दुई वर्षअघि खेलेका थिए। त्यसयता वेस्ट इन्डिजले १३ टेस्ट खेलिसकेको छ।
यसअघि चेसले एकदिवसीय (ODI) र टी-२० अन्तर्राष्ट्रियमा एक–एक पटक वेस्ट इन्डिजको कप्तानी गरिसकेका छन्। टेस्ट कप्तानको रूपमा उनको पहिलो जिम्मेवारी अष्ट्रेलियाविरुद्धको तीन टेस्टको घरेलु सिरिज हुनेछ, जुन जुन २५ मा ब्रिजटाउनमा सुरु हुनेछ — जुन चेसकै गृह मैदान पनि हो। बाँया हातका स्पिनर जोमेल वारिकन उपकप्तानका रूपमा नियुक्त भएका छन्।
यो सिरिज २०२५–२७ को वर्ल्ड टेस्ट च्याम्पियनसिप चक्रको सुरुआत पनि हुनेछ।
ब्रेथवेटले राजीनामा दिएपछि नयाँ नेतृत्व कृग ब्रेथवेटले मार्चमा टेस्ट कप्तानीबाट राजीनामा दिएपछि चेसको नियुक्ति गरिएको हो। ब्रेथवेटले कप्तानका रूपमा ३९ टेस्ट खेलेका थिए, जसमा वेस्ट इन्डिजले १० जित, २२ हार र ७ ड्र गरेको थियो।
क्रिकेट वेस्ट इन्डिज (CWI) ले कप्तान छनोटको लागि ६ जनाको सर्टलिस्ट तयार गरेर गहिरो मूल्याङ्कन प्रक्रिया अपनाएको थियो, जसमा नेतृत्व शैली, व्यवहार, तथा भूमिकाको उपयुक्तताका लागि साइकोमेट्रिक परीक्षणसमेत गरिएको थियो। अन्य अन्तर्वार्ताका लागि बोलाइएका खेलाडीहरूमा जोन क्याम्पबेल, टेभिन इम्लाच, जोशुआ डा सिल्भा, जस्टिन ग्रिभ्स र जोमेल वारिकन थिए।
शाई होप, जो वेस्ट इन्डिजको एकदिवसीय र टी-२० कप्तान छन्, उनले आफ्नो वर्तमान भूमिकामा ध्यान केन्द्रित गर्नका लागि टेस्ट कप्तानीको दौडमा नआउने निर्णय गरेका थिए।
बोर्ड र प्रशिक्षकको समर्थन CWI का अध्यक्ष किशोर शालोले भने, “यो छनोट प्रक्रिया अहिलेसम्मकै सबैभन्दा व्यावसायिक, वस्तुनिष्ठ र रणनीतिक सोचयुक्त प्रक्रिया थियो। यसले वेस्ट इन्डिज क्रिकेटमा नेतृत्व छनोटको नयाँ मापदण्ड स्थापना गरेको छ।”
टेस्ट टोलीका मुख्य प्रशिक्षक डेरेन सामीले भने, “म यो निर्णयलाई पूर्ण समर्थन गर्छु। नयाँ कप्तानले खेलाडीहरूबीचको सम्मान जितिसकेका छन्, जिम्मेवारी बुझेका छन् र नेतृत्व गुण देखाइसकेका छन्। म सम्पूर्ण समर्थकहरूलाई आग्रह गर्छु — हामी नयाँ अध्याय सुरु गर्दैछौं, साथ दिइदिनुहोस्।”
वेस्ट इन्डिज क्रिकेटमा नयाँ युगको सुरुवातका रूपमा हेरिएको यो निर्णयले टोलीलाई नयाँ दिशा दिने अपेक्षा गरिएको छ।
