काठमाडौँ :आर्थिक वर्ष २०८२/०८३ का लागि सरकारको कुल ६ अर्ब ८ करोड रुपैयाँ बजेट युवा तथा खेलकुद मन्त्रालयका लागि विनियोजन गरिएको छ। यो अघिल्लो वर्षको तुलनामा झण्डै दोब्बर हो। आर्थिक वर्ष २०८१/०८२ मा मन्त्रालयको बजेट ३ अर्ब ५० करोड रुपैयाँ थियो।

संघीय संसदको संयुक्त बैठकमा अर्थमन्त्री विष्णुप्रसाद पौडेलले प्रस्तुत गरेको बजेट अनुसार विभिन्न खेल पूर्वाधार निर्माण, स्तरोन्नति, प्रतियोगिता आयोजना र खेलाडीको क्षमता विकासमा ध्यान दिइएको छ।

क्रिकेट रगंशालामा उल्लेख्य लगानी

• काठमाडौँको मूलपानी, मोरङको गिरिजाप्रसाद कोइराला, कैलालीको फाप्ला र रुपन्देहीको सिद्धार्थ क्रिकेट रगंशालाको निर्माणका लागि ४२ करोड रुपैयाँ विनियोजन गरिएको छ।
• कीर्तिपुरस्थित त्रिवि क्रिकेट मैदानको स्तरोन्नतिका लागि ४० करोड रुपैयाँ छुट्याइएको छ।
• चितवनको गौतमबुद्ध क्रिकेट रगंशाला सन्दर्भमा त्रिभुवन विश्वविद्यालय इन्जिनियरिङ अध्ययन संस्थानको मूल्यांकनको आधारमा सृजित सम्पत्ति खरिद गर्न सशर्त अनुदानको व्यवस्था गरिएको छ।

राष्ट्रिय खेलकुद र क्षेत्रीय विकास

• १०औँ राष्ट्रिय खेलकुद सुर्खेतको वीरेन्द्रनगरमा आयोजना गर्न ५४ करोड रुपैयाँ विनियोजन गरिएको छ। यो अघिल्लो वर्षको ६० करोड रुपैयाँभन्दा थोरै कम हो।
• झापाको दमकमा अन्तर्राष्ट्रियस्तरको आधुनिक रगंशाला निर्माण गरिनेछ।
• सोलुखुम्बु, मुस्ताङ र जुम्लामा हाइ अल्टिच्युट स्पोर्ट्स स्टेडियम निर्माण गरिनेछ, खेल पर्यटन प्रवर्द्धनका लागि।

खेलाडी विकास र प्रोत्साहन

• खेलाडीलाई ‘म जित्न सक्छु’ भन्ने आत्मविश्वास विकास गर्न निरन्तर प्रशिक्षण र प्रतियोगिता सञ्चालन गरिनेछ।
• निजी क्षेत्रलाई खेल पूर्वाधारमा लगानी गर्न आकर्षित गरिने नीति लिइएको छ।
• सडक, खानेपानी र बिजुली जस्ता आधारभूत पूर्वाधारको पहुँच सुनिश्चित गरिनेछ।

महिला खेल र प्रोत्साहन योजनाहरू

• महिला लक्षित प्रशिक्षण र अभ्यास कार्यक्रम सञ्चालन गरिनेछ।
• उत्कृष्ट महिला खेलाडीलाई विशेष पुरस्कारको व्यवस्था गरिनेछ।
• प्रत्येक प्रदेशमा कम्तीमा ३ विद्यालयमा स्पोर्ट्स एकेडेमी सञ्चालन गरिनेछ।

अन्य पहलहरू

• राष्ट्रिय एन्टी डोपिङ एजेन्सी सञ्चालनका लागि आवश्यक बजेट छुट्याइएको छ।
• अन्तर्राष्ट्रिय प्रतियोगितामा पदक विजेता खेलाडीलाई प्रोत्साहन र तिनका सन्तानलाई शैक्षिक छात्रवृत्ति प्रदान गरिनेछ।
• खेलाडी र प्रशिक्षकले पाउँदै आएको प्रोत्साहन भत्तालाई निरन्तरता दिइनेछ।