ढाकाः अन्तर्राष्ट्रिय खुल्ला भेट्रान्स एथ्लेटिक्स च्याम्पियन्सीप २०२४ अन्तर्गत १५०० मिटर दौडमा नेपालका धावक रेवत दाहालले स्वर्ण जितेका छन् । 
बंगलादेशको ढाकामा जारी प्रतियोगितामा शुक्रबार दाहालले उक्त दुरी ४ मिनेट ५४ सेकेण्डमा पार गर्दै प्रथम हुन सफल भएका हुन् । दौडमा बंगलादेशले रजत र भारतले कास्य पदक हात पारेका छन् । 

यसअघि बिहीवार भएको ५ हजार मिटरको दौडमा दाहालले ५० वर्ष उमेर समुहबाट रजत पदक हात पारेका थिए । 
नेपालकै धावकद्वय बुद्धवीर लामा र धर्मराज महर्जनले स्वर्ण पदक जित्न सफल भएका थिए । प्रतियोगिता अन्तर्गत भोलि १ हजार मिटरतर्फ प्रतिष्पर्धा हुँदैछ । 

बंगलादेश भेट्रान्स एथ्लेटिक्स संघको आमन्त्रणमा नेपाल एथ्लेटिक्स एशोसिएशनले ६ जना धावकलाई नेपालको प्रतिनिधित्व गराउँदै ढाका पठाएको छ ।
बिहीबार र शुक्रबार भएको खेलमा नेपालले जम्मा तीन स्वर्ण, रजत र कास्य एक एकवटा हात पारेको छ । नेपालको प्रतिनिधि टोली १८ गते मंगलवार स्वदेश फर्कने तालिका छ ।