काठमाडौं :आईसीसी पुरुष टी–२० विश्वकप २०२६ का थप खेलहरूका लागि टिकट बिक्री औपचारिक रूपमा सुरु भएको छ। भारत र श्रीलङ्कामा आयोजना हुने यो बहुप्रतीक्षित प्रतियोगिताका थप फिक्स्चरका टिकट अब प्रशंसकहरूले किन्न सक्नेछन्।
फेब्रुअरी ७ बाट सुरु हुने प्रतियोगिताका टिकट बिक्री गत डिसेम्बरमै सुरु हुँदा नै विश्वभर ठूलो चर्चा बनेको थियो। पहिलो चरणमै भारत र श्रीलङ्काका आठ वटा रंगशालामा हुने खेलका लागि २० लाखभन्दा बढी टिकट बिक्रीका लागि राखिएको थियो।
उच्च रोमाञ्चक खेलहरू दिल्ली, चेन्नई, कोलकाता, मुम्बई, अहमदाबाद, क्यान्डी र कोलम्बोका रंगशालामा आयोजना हुनेछन्।
विश्वभरका क्रिकेटप्रेमीलाई ध्यानमा राख्दै आईसीसीले यसपटक अहिलेसम्मकै सबैभन्दा किफायती टिकट मूल्य तय गरेको छ। भारतमा टिकटको सुरुआती मूल्य भारु १०० (करिब १.११ अमेरिकी डलर) र श्रीलङ्कामा एलकेआर १००० (करिब ३.२६ अमेरिकी डलर) राखिएको छ।
यो प्रतियोगिता आईसीसी पुरुष टी–२० विश्वकपको १०औँ संस्करण हुनेछ। सन् २०१६ पछि पहिलोपटक यो प्रतिष्ठित प्रतियोगिता पुनः उपमहादेश फर्किन लागेको हो, जसको आयोजना त्यसबेला भारतले गरेको थियो।
सह–आयोजक राष्ट्रहरूले सन् २०२४ को संस्करणमा ऐतिहासिक उपाधि जितेपछि यसपटक घरेलु मैदानमै आफ्नो उपाधि रक्षा गर्नेछन्।
उता, श्रीलङ्काका लागि यो टी–२० विश्वकप आयोजना गर्ने दोस्रो अवसर हो। यसअघि उसले सन् २०१२ मा प्रतियोगिता आयोजना गरेको थियो।
विश्वकपको उद्घाटन दिन नै क्रिकेटप्रेमीहरूका लागि रोमाञ्चक खेलहरू तय छन्। पहिलो खेलमा कोलम्बोमा पाकिस्तान र नेदरल्यान्ड्स आमनेसामने हुनेछन्। त्यसपछि कोलकातामा वेस्ट इन्डिज र बङ्गलादेश, तथा मुम्बईमा भारत र अमेरिकाबीच प्रतिस्पर्धा हुनेछ।