सम्पादकीय, २०८१ सालको वैशाख १८, अर्थात् मे १—अन्तर्राष्ट्रिय मजदुर दिवसको दिन—हामीले एउटा नयाँ यात्रा थालेका थियौं ।

खेलकुदप्रेमीहरूलाई समर्पित अनलाइन मञ्च स्पोर्टस् हब न्यूज डटकम को सुरुवात यहित दिनबाट भयो ।  उद्देश्य थियो—नेपाली खेलकुदलाई समर्पित एक फरक ढंगको, नियमित र जिम्मेवार डिजिटल प्लेटफर्म निर्माण गर्ने ।
हामीले एउटा सानो तर साहसी सपना बोकेर स्पोर्टस् हब न्यूज डटकम सुरु गर्यौं । न ठूला लगानी थिए, न स्थापित सञ्जाल । थियो त केवल एक दृढ इच्छा—नेपाली खेलकुदको आवाज बन्ने र त्यसलाई निष्पक्ष, निष्ठावान रूपमा देशभर पु¥याउने । 
तर यो यात्रा सजिलो थिएन । कहिले प्रविधिको अभाव, कहिले समाचार अपडेटमा ढिलाइ, कहिले स्रोतको अभाव र कहिले बाहिरी उपेक्षा—हामीले सबै सामना गर्यौं ।

यथार्थ के हो भने, खेलकुदको अनलाइन पत्रकारिता अझै पनि कतिपयको नजरमा गम्भीरतापूर्वक नलिइने विषय हो । कतिपयले अहिले पनि ’नाक खुम्च्याउने’ गरेका छन् । 
अर्कोतर्फ, स्थापित र ठूला भनिएका मिडियासँग प्रतिस्पर्धा गर्नु निकै कठिन थियो । बजार शून्य जस्तै थियो, प्रायोजक पाउन कठिन, तर हाम्रा लागि जुनसुकै समाचार महत्त्वपूर्ण थिए । किनभने हाम्रा पाठक, हाम्रा प्रेरणा—तपाईंहरू—हामीबाट केही फरक अपेक्षा गरिरहनु भएको थियो ।
आज, एक वर्षपछि, हामी गौरवका साथ भन्न सक्छौं—हामी टिक्यौं । ती सबै आरोह–अवरोह पार गर्दै, स्पोट्र्स हब न्यूज डटकमले आफ्नो पहिलो वर्ष पुरा गरेको छ । र यो सम्भव भयो तपाइको माया, विश्वास र निरन्तर साथले । 
हामीलाई थाहा छ, हामीले चाहेजस्तो गर्न सकेका छैनौँ । अझ धेरै गर्न बाँकी छ । अझ धेरै सुधार, निरन्तरता र गहिराइ आवश्यक छ । तर आजको दिन, हामी केही क्षणलाई स्थिर भएर पछाडि फर्केर हेर्छौं—त्यो पहिलो पोस्टदेखि आजसम्मको यात्रा, ती साना जीतहरू ।

ती पाठकहरूको प्रतिक्रियाहरू, र ती धेरै रातहरू, जुन हामीले तपाईंसम्म सत्य, सन्तुलित र समयसापेक्ष सामग्री पुर्याउने प्रयासमा बितायौं ।
आज हामी गौरवका साथ भन्न सक्छौं—हाम्रा पाठक र समर्थकहरूले मात्र पोर्टल पढेर होइन, हामीलाई जिउन सघाएर साथ दिनुभएको छ । देशका कुनाकाप्चाबाट दैनिक दर्जनौँ पाठकहरूले समाचार, तस्वीर र जानकारी हामीलाई निशुल्क रुपमा पठाइरहनुभएको छ—केवल एउटै उद्देश्यका साथः “हाम्रो खेल, हाम्रो पहिचान”।

हामी अझ प्रतिबद्ध छौं—नेपाली खेलकुदको आवाज बन्न, र तपाईंहरूको भरोसा कायम राख्न । पहिलो बर्षको शुभकामना स्पोर्टस् हब न्यूज डटकमलाई ।  र धन्यवाद तपाईं सबैलाई । हामीसँग हिँडिरहनु भएको यात्रा–साथीहरूलाई ।