काठमाडौंः आईसीसी विश्वकपको समूह 'सी' मा आज भएको खेलमा स्कटल्याण्डले इटालीलाई ७३ रनको भारी अन्तरले पराजित गरेपछि नेपाली टोलीका लागि अघिल्लो चरणको ढोका खुल्ला भएको छ।
हिजो मात्रै क्रिकेटको पावरहाउस इंग्ल्याण्डसँग ४ रनको झिनो र दुर्भाग्यपूर्ण हार बेहोरेको नेपालका लागि इटालीको यो हार 'वरदान' सावित हुने देखिएको छ।
आजको खेलमा स्कटल्याण्डले दिएको २०८ रनको लक्ष्य पछ्याउने क्रममा इटाली मात्र १३४ रनमा समेटियो। यसको सिधा फाइदा नेपाललाई पुगेको छ। 
इटालीको नेट रन रेटयतिबेला अत्यन्तै खराब माइनस ३.६५० भएको छ। नेपालले इंग्ल्याण्डसँग कडा टक्कर दिएका कारण नेपालको रन रेट सम्मानजनक स्थितिमा छ। 
यदि फेब्रुअरी १२ मा नेपालले इटालीलाई सामान्य अन्तरले मात्र पराजित गरे पनि नेपाल अङ्क तालिकाको माथिल्लो स्थानमा उक्लिनेछ।
स्कटल्याण्ड विरुद्धको खेलमा इटालीका मुख्य खेलाडी तथा कप्तान वेन म्याड्सन घाइते हुनु र टोलीको ब्याटिङ अर्डर तासको महलझैँ ढल्नुले नेपाली बलरहरूका लागि ठूलो अवसर सिर्जना गरेको छ। मुम्बईको वानखेडे स्टेडियममा नेपाली स्पिनरहरूको जादु चल्न सके इटाली पुनः सस्तैमा समेटिने निश्चित छ।

अब नेपालको गणित सिधा छः 'जित र केवल जित'। इंग्ल्याण्ड विरुद्धको खेलमा देखाएको जुझारुपन र १८० रनको योगफलले नेपाली ब्याटरहरू लयमा रहेको प्रस्ट पारेको छ। फेब्रुअरी १२ मा इटाली विरुद्ध हुने खेलमा नेपालले जित निकालेमा समूहको समीकरण रोमाञ्चक बन्नेछ र नेपालको अघिल्लो चरण प्रवेशको सम्भावना निकै बलियो हुनेछ।