सोसल मिडिया
हाम्रो बारेमा
प्रयोगका सर्त
ललितपुर :महालक्ष्मी चेस एकेडेमीको आयोजनामा सम्पन्न दोस्रो जेजेस् क्याफे व्लिज खुला रेटिङ चेस प्रतियोगिताको उपाधि फिडे मास्टर (एफएम) क्षितिज भण्डारीले जितेका छन्।
स्विस लिग प्रणालीमा आधारित एकदिने द्रुतगतिको प्रतियोगितामा भण्डारीले ९ खेलमा आठ जित र एक बराबरीसहित ८.५ अंक प्राप्त गर्दै उपाधि हात पार्न सफल भए। अन्तिम चरणमा सानुराजा बज्राचार्यलाई हराउँदै उनले ट्रफीसहित ८ हजार रुपैयाँ नगद पुरस्कार प्राप्त गरे।
दोलखाका आशिष फुयालले पनि समान ८.५ अंक जोडेपनि प्रोग्रेसिभ प्वाइन्टका आधारमा दोस्रो स्थानमा रहँदै ६ हजार रुपैयाँ पुरस्कार पाए। उनले अन्तिम खेलमा सुरज महर्जनलाई पराजित गरेका थिए।
७.५ अंक जोडेका राजन पुरी तेस्रो स्थानमा रहँदै ४ हजार रुपैयाँ नगद जिते। उनले अन्तिम चरणमा प्रेमकृष्ण महर्जनमाथि विजय हासिल गरेका थिए।
ललितपुरका सरोज महर्जन चौथो र रौतहटका एफएम रुपेश जैशवाल पाँचौं स्थानमा रहे। झापाका प्रकाश नेपाल, पूर्व च्याम्पियन बद्रीलाल नेपाली, सजल न्यौपाने, सुनसरीका मुहान नर्सिङ श्रेष्ठ र सानुराजा बज्राचार्य क्रमशः छैटौंदेखि दशौं स्थानमा परे।
महिला वर्गमा महालक्ष्मी चेस एकेडेमीकी ग्लोसी श्रेष्ठ प्रथम भइन्। झापाकी पुनम प्रसाईं दोस्रो र कुसुम घिसिङ तेस्रो स्थानमा रहे।
ललितपुरको लुभुस्थित रोयल लुभु ब्याङ्क्वेटमा आयोजित पुरस्कार वितरण समारोहमा नेपाल बुद्धिचाल संघका अध्यक्ष हेराकाजी महर्जन, ललितपुर जिल्ला संघ अध्यक्ष विक्रम श्रेष्ठ, वडा सदस्य जयन्ती महर्जन, र विनोद केसीले विजयीहरूलाई सम्मानित गरे। कार्यक्रमको सभापतित्व हरिकृष्ण महर्जनले गरेका थिए भने संचालन महासंघका प्रवक्ता राजु ताम्राकारले गरेका थिए।
